ثرثرة شخصية

بحب في محمد الطريقة اللي بيتكلم بيها على لبنى بحس اني بشوفها في عينيه . و بحب في تامر اد كده بيبقى واخد باله من سالي حتى و هو بيتكلم و مركز في حاجة بتبقى بردة دماغو معاها . بحب في أحمد احترامه لأمل حتى و هم متخانقين بيتكلموا عادي قدام الناس ومهما اختلف معاها بيحترمها وبيناقشها بعدين . و الله بجد على عبد الرحيم رقته وجنتلته مع وردة بيكون هيشيلها شيل و بيحسب حساب الهمسة لتيجي تضايقها . كلو و خوف عمر على عليا .. شايلها شيل الصبح يكلمها فطرتي يا حبيبتي وحياتي لأ كده مينفعش و بليل يكلمها خدتي الدوا و يحكيلها حدوتة . الجميل في حسام المفآجات الصغيرة اللي بيرتبها لريهام .. ورق صغير فيه كلام يجنن تحت المخدة و في علبة الخواتم بتاعتها . اللي بعشقه في خالد رغم أن الشغل بتاعه صعب و عملي جدا لكنه دايما يحكي لداليا شغله و المشاكل اللي بيقابلها و جديد العملا و السوق وايه الأفكار والدنيا . وبحترم في على أنو عارف اد ايه شيماء مرتبطة بهوايتها عشان كده بيسيبلها وقت تكون فيه لنفسها و ياخد باله هو من البيت و البيبى و أوقات يحاول يشاركها من غير ما يخنق خصوصيتها . بحب في حاتم الفسح اللي بيفسحها لرضوى وأكتر حاجة بتبهرني في هشام البصة اللي بيبصها لدينا حتى لو وسط الناس ياربيييييييييييي بحس أنو حضنها و باسها و طبطب عليها و ... بس في البصة ديه حاجة كده قشعرة . بعشق في و ائل لما يعرف أن سالي زعلانة يقوم واخدها من ايدها و يقعدها ادام التسريحة .. يسرحلها شعرها و يحطلها مانيكير . لكن أكتر حاجة أحبها في لؤي تاتش الرومانسية من و قت للتاني أوقات يكون هيموت ويشوف حنان وتطلع في دماغه يشوفها دلوقتي مش بفيديو كول والكلام ده يقوم طالع مخبط على بابها و زي ما تيجي تيجي هي بتبقى دقيقة مسروقة من الوقت سرقة بس بتشقلب كيان البنت . أجمل حاجة في عمر أنو بيصحي هند لصلاة الفجر ويقعد يقرا قرآن معاها و يفكرها بدعاء الصبح . الحاجة اللي مخلياني أحب هيثم و دايمافي عينيا كبير .. المسئولية . الولد ده عارف يعني ايه يكون راجل وازاي يخلي الست اللي معاه ست ومدي نور احساس بالاستقرار ... صفات وهمية - لرجال وهميين وردوا هنا - هي من و حي التفاؤل أو من وحي السخرية أو من وحي واقع ربما أحياه في القريب